名伶粵曲推薦 男燒衣 (南音) 主唱：梁漢威

名伶粵曲推薦：男燒衣

主唱：梁漢威 (南音)

首先，鄙人在此謹向已故名伶梁漢威先生致以崇高敬意，梁漢威先生對發揚傳統粵劇文化不
遺餘力，貢獻良多，真一代宗師也！

內容簡介﹕男子在珠江口船上認識一名歌妓後發展感情，但當男子離去一段時間回來後發現
妓女自盡，故在船上燃燒冥鏹，悼念情人。

附《男燒衣》古本原詞〔轉自：巴別二世的博客〕：

聞得妹你話死咯，我實在見悲傷，妹你為因何故，攪到自縊懸樑，人話你死囉，我都尚屬思
疑，我唔信佢地講嘅，今日果然你系死左咯，我都實在悲傷，妹呀，你死因銀幾十兩，把我
舊情一旦付落水茫茫，唔望 與嬌你彈共唱，唔望叫艇遊河賞珠江，唔望八月中秋仝把月賞，
唔望龍舟佳節共你看鬥龍航，我話身契幫你贖返同你上岸，更話兩個月就帶妹你從良，今日
怨恨幾尺紅羅將你命喪，縱有黃金萬兩難以買你還陽，呢陣天跌一個落黎唔慌我重想，人話
靚時唔見妹你靚得咁心傷，今晚夜月明星又朗，不若叫隻小舟將水陸放，等你早登仙界者直
上慈航。

忙解纜，出到江濱，只見江楓漁火照我愁人，各物擺齊兼共果品，願妹你前來鑒領我情真，
燒到了紙錢珠淚惡忍，三杯薄酒呢我奠妹孤魂。

燒到衣裳首飾共金銀，燒到童男童女等你相親近，你落去服侍主人要聽佢酌斟，佢高聲叫你
要低聲應，大褦鎖匙交你收緊, 你倆切勿頑皮.....激著主人。

燒到個盒胭脂和水粉，燒埋幾套百褶羅裙，燒到鍾籠鬼子檯重有酸枝凳，燒到刨花兼軟朻，
燒到揀妝一個照妹孤魂。

燒到芽蘭帶，重有個對繡花鞋，可恨當初唔好無早日帶你埋街，免使呀你在青樓多苦捱，咁
好沉香當爛柴。呢條芽蘭帶，及系小生親手買，可惜對花鞋重繡得咁佳。記得八月中秋呢我
地同把月來拜，重話二人衾枕永和諧，妹呀幾十兩既紋銀係你攞命債，咁樣無端把妹你命嘥,
愈思愈想心痛壞。珠淚流唔哂，妹呀你嘅夢中魂魄共我講幾句情話。

燒到被鋪蚊帳，係出自杭州，重有香珠一串十八子搭在妹枕頭，我唔望鴛鴦同聚首，見物思
人慘把魂鉤，妹呀你在黃泉曾否念舊，兩家情愛有無付水流。燒到白銅煙帶與共銀縺扣，人
話水煙至靚出在蘭州，你得閑 無事裝返兩口，得來陰府可以解煩愁。燒到煙槍煙托雷州斗，
又來燒到煙屎鉤，重有局沙一盞光明透，但凡燈暗你要自已添油，呢盒公煙原本係舊架，馨
香翳膩咯都 可以解得下煩憂，你清閑無事燂返幾口，不妨陰府自已綢繆。

咁多物件燒來交你手，你且關防門戶莫畀人偷，妹你生前所用般般都有，今日把火焚燒在水
渡頭, 點得黃泉共妹你敘首，點得霎時相會在抬頭。

再酌酒，奠妹粧檯，願妹呀你前來鑒領我一杯，飲過此杯呢離苦海，等你早登天界係直上蓬
萊。哭極咁多唔見你會，莫非你將我情義當係薄幸王魁，此情一去難復再，我胸前一拍自見
癡呆。

又到艇嫂上前同君抹淚，叫聲呀大相呀你咪咁悲哀，人話男子心腸多變改，我睇君你情義的
確無人陪，你睇蠟燭替君流血淚，半天仙鶴渡郎追，你不如忍淚埋街去，老奴情願共你為媒,
你既有真心寧守耐，我找尋一個重靚過花魁，多情愁無多情配咩。免令今夜自已癡呆，唉呀
你快些抹乾眼淚，老身立即棹你回。

忙轉艇，快如雲，雙槳齊搖海面奔，海闊風狂喎呀大相你坐穩，老奴共你講幾句時文，呢我
地隔離街有個叫做逢人恨，佢腳又細時滿手黹針，年方二八又識書禮呀，詩辭歌賦件件皆能,
因為前時有位少爺把佢婚姻問，佢要揀多情男子正合得佢心，佢話多情要揀多情襯，佢話多
情人仔就不拘禮銀，重話兩家真情至得煙韌，重話男情女義合相登，離舟登陸咯你要行穩，
保重要緊，保重要緊。咁我鵲橋高架起，等你直上浮雲。

〔完〕

註一：經考證，曲中的「軟抆」正寫應作「軟抿」，小梳軟刷也，用作蘸水或油梳理頭髮，
抿字古雅，證粵地白話文保留了不少中土古文化，現今南海鄉間仍有白話稱髮刷為「髮抿」
紅樓夢第四十二回：「不覺後悔，不該令他抿上鬢去」。

註二：曲中的「芽蘭帶」究竟是何物？不少人認同是纒足布條，有說是抹胸，更離格有說是
月經布，都錯！最先是紥腰布帶，漸用作褲頭帶、裙帶，一般長三市尺左右。

舊時粵地男女唐裝褲子寬管深襠，圍縫巨闊白扣布作褲頭，穿到過臍，穿上後將褲頭餘剩以
左搭右、右搭左方式收束褲子，再往外翻，摺一摺，最後緊紥一條「芽蘭帶」作保險。芽蘭
帶在日常生活中有妙用：藏錢藏金，所以舊時賊仔打刼要人寬衣解帶脫褲。芽蘭帶當然還可
用于必要時包綁東西，還可以用來上吊自縊。〈啋！大吉利是〉

為何有「芽蘭帶」此名？實際僅是古名「牙襴帶」的白話轉音變字，牙字讀「雅」意思解：
固抱。襴，攔繫腰肚之束物也。集韻：「襴，衣與裳連」。元‧王實甫《西廂記》第二本‧
第二折：「烏紗小帽耀人明，白襴淨，角帶傲裎黃」。裎是加佩于襴之色縧，廣雅疏證‧卷
七‧釋器：「佩紟謂之裎」，即知白襴是紥腰布帶。